राष्ट्रिय स्वतन्त्र पार्टी (रास्वपा)ले रुपन्देही क्षेत्र नम्बर ३ का लागि डा. लेखजंग थापालाई उम्मेदवार बनाएको छ। पार्टी सचिवालयको बैठकले ९ जना आकांक्षीमध्ये थापालाई चयन गरेको हो।
उपनिर्वाचनका लागि थापासहित सुलभ खरेल, ज्ञानु पौडेल, जितबहादुर गुप्ता, मधुप्रसाद अर्याल, पार्थिवेन्द्र उपाध्याय, कुसुम महर्जन, पुनमकुमारी अग्रवाल र रचना क्षेत्री आकांक्षी थिए। उम्मेदवार चयन गर्न १२ भदौमा बिहान ७ बजेदेखि साँझ ७ बजेसम्म प्राइमेरी इलेक्शन सम्पन्न गरिएको थियो। रास्वपाका अनुसार अनलाइन भोटिङमा सबैभन्दा बढी भोट पाएका थापालाई उम्मेदवार घोषणा गरिएको हो।
डा. थापा वरिष्ठ न्युरोलोजिस्ट हुन्। उनले एमबीबीएस, इन्टरनल मेडिसिनमा एमडी र न्युरोलोजीमा एमडी गरेका छन्। हाल नेसनल न्युरो सेन्टर, महाराजगञ्ज काठमाडौंका न्युरोलोजी विभाग प्रमुख तथा नेपाल स्ट्रोक एसोसिएसनका संस्थापक अध्यक्ष रहेका छन्।
