मौसम पूर्वानुमान महाशाखाका अनुसार हाल देशभर मनसुनी वायु कमजोर भए पनि स्थानीय वायुको आंशिक प्रभाव कायम छ। यसको असरले देशको अधिकांश पहाडी भूभागमा सामान्य बदली र अन्य स्थानमा आंशिक बदली देखिएको छ। कोशी र बागमती प्रदेशका पहाडी क्षेत्रमा हल्कादेखि मध्यम वर्षा भइरहेको छ।
आज दिउँसो पहाडी भूभागमा सामान्यतया बदली रहने अनुमान छ। कोशी, बागमती, गण्डकी र लुम्बिनी प्रदेशका पहाडी भूभागका थोरै स्थानमा मध्यम वर्षा हुन सक्नेछ भने बाँकी प्रदेशका पहाडी तथा तराई भूभागका केही स्थानमा पनि वर्षाको सम्भावना छ। विशेषगरी कोशी र बागमती प्रदेशका पहाडी क्षेत्रमा भारी वर्षा पर्न सक्ने अनुमान गरिएको छ।
आज राति पनि कोशी र मधेस प्रदेशसहित देशका विभिन्न पहाडी भूभागमा सामान्य बदली रहनेछ। कोशी, मधेस, बागमती र गण्डकी प्रदेशका केही स्थानमा मध्यम वर्षा र कोशी–बागमतीका पहाडी क्षेत्रमा भारी वर्षा पर्न सक्ने भएकाले सतर्कता आवश्यक भएको महाशाखाले जनाएको छ।
