जल तथा मौसम विज्ञान विभागको मौसम पूर्वानुमान महाशाखाले आगामी तीन दिनसम्म देशभर वर्षाको प्रभाव रहने जनाएको छ। शनिबार राति जारी बुलेटिनअनुसार कोशी, मधेश, बागमती र गण्डकी प्रदेशका धेरै स्थानमा मेघगर्जनसहित मध्यम वर्षा हुने सम्भावना छ। ती प्रदेशका केही भूभागमा भारी र एक–दुई स्थानमा धेरै भारी वर्षा हुने चेतावनी दिइएको छ।
आइतबार दिउँसो कोशी, मधेश र बागमतीमा पूर्ण बदली रहने र ती क्षेत्रमा भारी वर्षा हुने पूर्वानुमान गरिएको छ। गण्डकी र लुम्बिनीका केही भागमा समेत वर्षा हुने सम्भावना छ। राति भने पहाडी भूभागमा मध्यम वर्षा र बागमती, कोशीका केही क्षेत्रमा भारी वर्षा हुनसक्ने विभागले जनाएको छ।
सोमबार दिउँसो कोशी, बागमती, कर्णाली र सुदूरपश्चिममा साधारण बदली रहने र थोरै स्थानमा मेघगर्जनसहित मध्यम वर्षा हुने सम्भावना छ। राति भने अधिकांश स्थानमा मौसम सुधार हुँदै जाने अनुमान गरिएको छ।
विभागले विशेषगरी पहाडी र तराई क्षेत्रका नदी, खोलानाला आसपासका बासिन्दालाई सतर्क रहन आग्रह गरेको छ।
