Nepal Oil Corporation ले पेट्रोल, डिजेल र मट्टितेलको मूल्य प्रतिलिटर १५ रुपैयाँले बढाएको छ। नयाँ मूल्य चैत २० गते मध्यरातदेखि लागू हुने निगमले जनाएको छ।
नयाँ मूल्यअनुसार काठमाडौं, पोखरा र दिपायल (तेस्रो वर्ग) मा पेट्रोल प्रतिलिटर २०२ रुपैयाँ पुगेको छ भने डिजेल र मट्टितेल १८२ रुपैयाँ कायम भएको छ। यसअघि यी स्थानमा पेट्रोल १८७ रुपैयाँ र डिजेल–मट्टितेल १६७ रुपैयाँ थियो।
पहिलो वर्गअन्तर्गत चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्जमा पेट्रोलको मूल्य १८४ बाट बढेर १९९ रुपैयाँ ५० पैसा पुगेको छ। त्यस्तै डिजेल/मट्टितेल १६४ रुपैयाँ ५० पैसाबाट बढेर १७९ रुपैयाँ ५० पैसा पुगेको छ।
दोस्रो वर्गमा रहेका सुर्खेत र दाङमा पेट्रोल १८६ बाट २०१ रुपैयाँ र डिजेल/मट्टितेल १६६ बाट १८१ रुपैयाँ पुगेको छ।
निगमले अन्तर्राष्ट्रिय बजारको मूल्यअनुसार समायोजन गरिएको जनाउँदै यो निर्णयपछि पनि १५ दिनमा करिब ११ अर्ब ७१ करोड रुपैयाँ घाटा हुने जनाएको छ।
