सरकारले देशभरका सरकारी अस्पताल तथा स्वास्थ्य संस्थाहरूमा साताको दुई दिन सार्वजनिक बिदा दिने निर्णय गरेको छ। स्वास्थ्य क्षेत्रमा क्रियाशील १४ वटा संयुक्त पेसागत संगठनहरूको चर्को दबाब र निरन्तरको मागपछि मन्त्रिपरिषद्ले यो निर्णय लिएको हो।
नयाँ व्यवस्था अनुसार अब शनिबार र आइतबार देशभरका सरकारी अस्पतालका नियमित बहिरङ्ग (ओपीडी) सेवाहरू बन्द रहनेछन्. स्वास्थ्य तथा जनसंख्या मन्त्रालयका अनुसार आम नागरिकलाई पर्ने असुविधालाई मध्यनजर गर्दै आकस्मिक (इमरजेन्सी) र अन्तरङ्ग (इनडोर) सेवाहरू भने साविक झैँ २४ सै घण्टा सुचारु रहनेछन्.
स्वास्थ्यकर्मीहरूको कार्यबोझ कम गर्न र अन्य सरकारी सेवा सरह सुविधा प्रदान गर्न यो कदम चालिएको मन्त्रालयको भनाइ छ। यद्यपि, आइतबारको बिदाले बिरामीको चाप सोमबार अत्यधिक बढ्ने र सेवा प्रवाहमा चुनौती थपिन सक्ने भन्दै केही स्वास्थ्य विज्ञहरूले चासो व्यक्त गरेका छन्।
सरकारले यसअघि इन्धन बचतका लागि दुई दिने बिदा परीक्षण गरे पनि स्वास्थ्य सेवामा उत्पन्न अन्योलका कारण विभिन्न समयमा निर्णयहरू परिमार्जन हुँदै आएका थिए।
