मौसम पूर्वानुमान महाशाखा का अनुसार हाल नेपालमा पश्चिमी तथा स्थानीय वायुका साथै पूर्वी भूभाग नजिकको न्यून चापीय प्रणालीको आंशिक प्रभाव रहेको छ। यसको असरले देशका हिमाली र पहाडी क्षेत्रमा सामान्यदेखि घना बदली देखिएको छ भने अन्य भूभागमा आंशिक बदली रहेको छ। गण्डकी प्रदेशका केही स्थानमा हल्का वर्षा भइरहेको छ।
आज दिउँसो कोशी, मधेस, बागमती र गण्डकी प्रदेशसहित लुम्बिनी, कर्णाली र सुदूरपश्चिमका पहाडी तथा हिमाली क्षेत्रमा सामान्य बदली रहनेछ। तीमध्ये कोशी, बागमती र गण्डकीका केही स्थान तथा अन्य प्रदेशका पहाडी भूभागमा चट्याङसहित मध्यम वर्षा र हिमपातको सम्भावना रहेको छ।
आज राति पनि मौसमको अवस्था यस्तै रहनेछ। विशेषगरी कोशी प्रदेशका धेरै स्थान तथा अन्य प्रदेशका केही स्थानमा वर्षा हुने अनुमान गरिएको छ। कोशी र गण्डकीका पहाडी क्षेत्रमा एक–दुई स्थानमा चट्याङसहित भारी वर्षा र हिमपातको सम्भावना रहेकाले सतर्कता अपनाउन महाशाखाले आग्रह गरेको छ।
