मौसम पूर्वानुमान महाशाखाका अनुसार हाल नेपालमा पश्चिमी वायु, स्थानीय वायु तथा पूर्वी भूभाग नजिकको न्यून चापीय क्षेत्रको संयुक्त प्रभाव रहेको छ। यसको असरले गण्डकी प्रदेशसहित हिमाली र पहाडी क्षेत्रमा साधारणतया बादल लागेको छ भने तराईका धेरै भागमा मौसम मुख्यतया सफा देखिएको छ। गण्डकीका धेरै स्थान तथा कोशी र बागमतीका केही स्थानमा चट्याङसहित मध्यम वर्षा भइरहेको छ।
आज दिउँसो कोशी, बागमती र गण्डकीसहित लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागमा बादल लाग्नेछ। केही स्थानमा चट्याङसहित मध्यम वर्षा र तराईका केही भागमा हल्का वर्षाको सम्भावना छ। लुम्बिनी र सुदूरपश्चिम तराईमा तातो दिन रहने अनुमान गरिएको छ भने केही तराई क्षेत्रमा हावाहुरीको सम्भावना पनि छ।
आज राति कोशी र मधेस प्रदेशका केही स्थानमा, बागमती र गण्डकीका थोरै स्थानमा मध्यम वर्षा हुनसक्ने महाशाखाले जनाएको छ। साथै पहाडी र हिमाली भूभागमा हल्का वर्षाको सम्भावना कायमै रहनेछ।
