सरकारले बालपोषण भत्ता वृद्धि गर्ने घोषणा गरेको छ। शुक्रबार संघीय संसद्मा आर्थिक वर्ष २०८३/८४ को बजेट प्रस्तुत गर्दै अर्थमन्त्री डा. स्वर्णिम वाग्लेले बालपोषण भत्ता बढाएर मासिक १ हजार रुपैयाँ पुर्याइने जानकारी दिएका हुन्।
सरकारका अनुसार बालबालिकाको पोषण अवस्था सुधार गर्दै दीर्घकालीन रूपमा स्वस्थ र सक्षम जनशक्ति निर्माण गर्ने उद्देश्यले यो निर्णय गरिएको हो। विशेष गरी गरिब तथा जोखिममा रहेका परिवारका बालबालिकालाई लक्षित गरी यो सुविधा उपलब्ध गराइनेछ।
अर्थमन्त्री वाग्लेले सामाजिक सुरक्षालाई अझ प्रभावकारी र लक्षित बनाउन सरकार प्रतिबद्ध रहेको बताए। यसले बालअधिकार संरक्षण र पोषण सुधारमा महत्वपूर्ण योगदान पुर्याउने विश्वास लिइएको छ।
