विशेष अदालतले सम्पत्ति शुद्धिकरण मुद्दामा आरोपित सुलभ अग्रवाल र दिपक भट्टलाई पुर्पक्षका लागि थुनामा पठाउन आदेश दिएको छ।
अध्यक्ष सुदर्शनदेव भट्ट तथा सदस्यहरू उमेश कोइराला र विदुर कोइरालाको इजलासले थुनछेक बहस सम्पन्न भएपछि दुवैलाई थुनामा राखेर मुद्दाको थप सुनुवाइ अघि बढाउने निर्णय गरेको हो। अदालतको आदेशसँगै अब उनीहरू थुनामै रहेर मुद्दाको प्रक्रिया सामना गर्नेछन्।
यसअघि प्रहरीले दिपक भट्टलाई चैत १९ गते र सुलभ अग्रवाललाई चैत २२ गते पक्राउ गरेको थियो। अनुसन्धानका क्रममा उनीहरूविरुद्ध सम्पत्ति शुद्धिकरणसम्बन्धी कसुरमा मुद्दा दायर गरिएको थियो। अदालतको पछिल्लो आदेशले उक्त बहुचर्चित मुद्दाको न्यायिक प्रक्रिया अर्को चरणमा प्रवेश गरेको छ। अब अभियोजन पक्षले प्रस्तुत गरेका प्रमाण तथा प्रतिवादी पक्षका दाबी–प्रतिदाबीका आधारमा मुद्दाको अन्तिम फैसला हुनेछ।
