काठमाडौं: रुकुम पूर्वको कोल क्षेत्रलाई केन्द्रबिन्दु बनाएर आइतबार साँझ ५.० म्याग्निच्युडको भूकम्प गएको छ। राष्ट्रिय भूकम्प मापन तथा अनुसन्धान केन्द्रका अनुसार भूकम्प साँझ ४:३० बजे गएको हो।
भूकम्पको धक्का रुकुम पूर्वसँगै रोल्पा, दाङ, अर्घाखाँची लगायत आसपासका जिल्लामा पनि बलियो रूपमा महसुस गरिएको थियो। धक्का महसुस भएपछि धेरै स्थानीय घरबाहिर निस्किएका थिए।
हालसम्म भूकम्पका कारण कुनै मानवीय वा भौतिक क्षति भएको आधिकारिक जानकारी प्राप्त भएको छैन। स्थानीय प्रशासन तथा सम्बन्धित निकायले प्रभावित क्षेत्रको अवस्था बुझ्ने र सम्भावित क्षतिको विवरण संकलन गर्ने कार्य गरिरहेका छन्।
अधिकारीहरूले सर्वसाधारणलाई अफवाहमा विश्वास नगर्न, आधिकारिक सूचनालाई मात्र आधार बनाउन तथा आवश्यक सतर्कता अपनाउन आग्रह गरेका छन्।
