निकोलस पेपेको दुई उत्कृष्ट गोलको मद्दतमा आइभोरी कोस्टले क्युरासाओलाई २–० ले पराजित गर्दै आफ्नो फुटबल इतिहासमै पहिलो पटक विश्वकपको नकआउट (अन्तिम ३२) चरणमा स्थान सुरक्षित गरेको छ। यसअघि तीन पटक विश्वकप खेले पनि समूह चरण पार गर्न नसकेको आइभोरी कोस्टका लागि यो उपलब्धि ऐतिहासिक बनेको हो।
समूह ‘ई’ को निर्णायक खेलमा नकआउट चरण पुग्न एक अंक पर्याप्त भए पनि आइभोरी कोस्ट सुरुदेखि नै आक्रामक रूपमा प्रस्तुत भयो। खेलको सातौँ मिनेटमा यान डियोमान्डेले विपक्षी डिफेन्डरबाट बल खोसेपछि निकोलस पेपेले सहज गोल गर्दै टोलीलाई अग्रता दिलाए। त्यसपछि ६५औँ मिनेटमा पेपेले बायाँ खुट्टाबाट उत्कृष्ट प्रहार गर्दै व्यक्तिगत दोस्रो गोल गरे र टोलीको जित सुनिश्चित गरे।
यस जितसँगै आइभोरी कोस्टले समूह ‘ई’ मा ६ अंक जोड्दै दोस्रो स्थान हासिल गर्यो। एउटै विश्वकप संस्करणमा दुई खेल जित्ने यो टोलीको पहिलो अवसर पनि हो। मुख्य प्रशिक्षक इमर्स फाएले ऐतिहासिक सफलताको श्रेय टोलीको एकता र स्वस्थ प्रतिस्पर्धालाई दिएका छन्।
पराजित क्युरासाओले पनि प्रतियोगिताभर प्रतिस्पर्धात्मक प्रदर्शन गर्यो। यसअघि इक्वेडरसँग बराबरी खेल्दै पहिलो अंक जोडेको टोलीले आफ्नो क्षमता प्रमाणित गरेको छ। आइभोरी कोस्टको यो सफलता डिडिएर ड्रोग्बा र याया टुरेजस्ता पूर्व दिग्गज खेलाडीहरूको पुस्ताले पूरा गर्न नसकेको उपलब्धि हासिल गर्दै नयाँ इतिहास रचेको रूपमा हेरिएको छ।
