नेपाल प्रिमियर लिग (NPL) क्रिकेटमा आज (शनिबार) दुई खेल हुनेछन्। पहिलो खेलमा बिहान ९ बजे त्रिभुवन विश्वविद्यालय (टीयू) अन्तर्राष्ट्रिय मैदानमा अपराजित सुदूरपश्चिम रोयल्स र जितविहीन लुम्बिनी लायन्स भिड्दै छन्। यो खेलमा राष्ट्रिय क्रिकेट टिमका कप्तान रोहित पौडेल र टाइगर उपनामले परिचित दीपेन्द्र सिंह ऐरी बीच रोचक प्रतिस्पर्धा हुने अपेक्षा गरिएको छ।
सुदूरपश्चिम रोयल्सले यसअघि खेलेका दुई खेलमा शानदार जित दर्ता गरेको छ। पहिलो खेलमा विराटनगर किङ्ग्सलाई ९० रनले र दोस्रो खेलमा काठमाडौं गुर्खाजलाई ७३ रनले हराएको थियो। लुम्बिनी लायन्स भने अहिलेसम्म जितको खाता खोल्न सकेको छैन। पहिलो खेलमा लुम्बिनी विराटनगर किङ्ग्ससँग दुई विकेटले र दोस्रो खेलमा पोखरा एभेन्जर्ससँग पराजित भएको थियो।
आजको दोस्रो खेलमा दिउँसो १:१५ बजे कर्णाली याक्स र विराटनगर किङ्ग्स त्रिवि क्रिकेट मैदान, कीर्तिपुरमा आमनेसामने हुँदैछन्।
कर्णाली याक्सले तीन खेल खेलेको छ, जसमा दुई खेलमा पराजित हुँदा एउटा खेल जितेको छ।
विराटनगर किङ्ग्सले पनि तीन खेल खेलेको छ र एउटामा जित्दै दुई खेलमा हार बेहोरेको छ।
दुवै खेलले लिग तालिकामा महत्त्वपूर्ण प्रभाव पार्नेछ।
