जनकपुर बोल्ट्सले नेपाल प्रिमियर लिग (एनपीएल) को पहिलो संस्करणको उपाधि जित्न सुदूरपश्चिम रोयल्सलाई पराजित गरेको छ। कीर्तिपुरस्थित त्रिवि क्रिकेट मैदानमा सम्पन्न फाइनल खेलमा जनकपुरले उत्कृष्ट प्रदर्शन गर्दै उपाधि आफ्नो पक्षमा पारेको हो।
यसअघि, दुवै टोलीले लिग चरणमा प्रभावशाली प्रदर्शन गरेका थिए। सुदूरपश्चिम रोयल्सले लिग चरणमा शीर्ष स्थान हासिल गरेको थियो भने जनकपुर बोल्ट्स दोस्रो स्थानमा रहेको थियो। फाइनल खेलमा जनकपुरले सुदूरपश्चिमलाई पराजित गर्दै पहिलो संस्करणको एनपीएल उपाधि जित्न सफल भयो।
जनकपुर बोल्ट्सका कप्तान आशिफ शेखले फाइनल अघि दिएको अन्तर्वार्तामा भनेका थिए, “टी२० मा जे पनि हुन सक्छ, जुन टिमले कम गल्ती गर्छ, उसैले जित्ने हो। हामी त्यसमा सतर्क हुनेछौँ।”
प्रतियोगिताकै सबैभन्दा बलियो मानिएको सुदूरपश्चिम रोयल्सलाई पराजित गर्दै जनकपुरले पहिलो संस्करणको एनपिएल उपाधि जितेको हो। उपाधि जित्दै गर्दा जनकपुरले सुदूरपश्चिम विरूद्धको यसअघिका दुवै हारको पनि बदला लियो।
जनकपुरको जितमा लाहिरू मिलन्थाले उत्कृष्ट ब्याटिङ गरे। उनलाई कप्तान आशिफ शेखले पावरप्लेमा राम्रो साथ दिए।
एनपिएलको पहिलो विजेता टुंगिएपछि त्रिवि मैदान उत्सवमय बनेको छ। जनकपुरले उपाधि जित्दै गर्दा त्रिवि मैदानमा आतिसबाजी भएको थियो।
जनकपुरका खेलाडीहरूले आफ्ना समर्थकहरूलाई धन्यवाद दिँदै मैदान परिक्रमा गरेका थिए।
