जल तथा मौसम विज्ञान विभागको मौसम पूर्वानुमान महाशाखाले हाल देशमा पश्चिमी न्यून चापीय प्रणालीको आंशिक प्रभाव रहेको जनाएको छ। यसका कारण देशका विभिन्न स्थानमा हल्का वर्षा र हिमपातको सम्भावना रहेको छ।
विभागका अनुसार कर्णाली, सुदूरपश्चिम र गण्डकी प्रदेशका उच्च पहाडी तथा हिमाली क्षेत्रहरूमा आंशिकदेखि साधारणतया बदली रहेको छ भने बाँकी भूभागमा मौसम मुख्यतया सफा छ।
आज दिउँसो देशभर आंशिकदेखि साधारणतया बदली रहने विभागले जनाएको छ। लुम्बिनी, कर्णाली र सुदूरपश्चिम प्रदेशका केही स्थान तथा बागमती र गण्डकी प्रदेशका थोरै स्थानमा हल्का वर्षाको सम्भावना छ। त्यस्तै, देशका उच्च पहाडी तथा हिमाली क्षेत्रका धेरै स्थानमा हल्का हिमपात हुने अनुमान गरिएको छ।
आज राति कोशी, मधेश र बागमती प्रदेशका पहाडी क्षेत्रहरूमा साधारणतया बदली रहनेछ भने बाँकी भूभागमा आंशिक बदलीदेखि मौसम सफा रहनेछ।
बागमती, गण्डकी र कर्णाली प्रदेशका केही स्थानमा छिटपुट वर्षाको सम्भावना रहेको छ। त्यस्तै, कोशी र बागमती प्रदेशका उच्च पहाडी तथा हिमाली क्षेत्रहरूमा हल्का हिमपातको सम्भावना रहेको विभागले जनाएको छ।
विभागले लुम्बिनी, कर्णाली र सुदूरपश्चिम प्रदेशका केही स्थानहरूमा हल्का वर्षा र हिमपात हुने तथा यसले जनजीवन, यातायात, पर्यटन र हवाई उडानमा असर गर्न सक्ने भएकाले सतर्क रहन आग्रह गरेको छ।
आज सूर्योदय बिहान ६ बजेर ५६ मिनेटमा र सूर्यास्त साँझ ५ बजेर २८ मिनेटमा हुनेछ।
