🌧️ नेपालमा मनसुन कमजोर, केही प्रदेशमा मध्यमदेखि भारी वर्षाको सम्भावना

मनसुनको न्यून चापीय रेखा सरदर स्थानको दक्षिणतर्फ सरेका कारण नेपालमा मनसुन केही कमजोर बनेको छ। यद्यपि, बङ्गालको खाडीबाट जलवाष्पयुक्त हावा भित्रने क्रम भने निरन्तर जारी छ।

हाल देशभर सामान्यतया बदली छ। कोशी, बागमती, गण्डकी र लुम्बिनी प्रदेशका केही स्थानमा मध्यम वर्षा भइरहेको छ भने कर्णाली प्रदेशका पहाडी भू-भागका एक-दुई स्थानमा हल्का वर्षा भइरहेको छ।

मौसम पूर्वानुमान अनुसार सोमबार पनि देशभर साधारणतया बदली रहनेछ। बागमती, गण्डकी र लुम्बिनी प्रदेशको तराई तथा पहाडी भू-भागसहित बाँकी पहाडी क्षेत्रमा मध्यम वर्षा हुने सम्भावना छ। साथै, बाँकी तराई भू-भागका एक-दुई स्थानमा समेत वर्षा हुने अनुमान गरिएको छ।

त्यस्तै, लुम्बिनी प्रदेशको तराई क्षेत्र, कोशी प्रदेश र बागमती प्रदेशको पहाडी भू-भागका केही स्थानमा भारी वर्षा हुने सम्भावना रहेको मौसमविद्हरूले बताएका छन्।