आन्तर्राष्ट्रिय क्रिकेट परिषद् (ICC) ले अमेरिका क्रिकेट बोर्डको सदस्यता तत्काल प्रभावबाट निलम्बन गरेको छ। आईसीसीका अनुसार, अमेरिका क्रिकेटले बारम्बार सदस्यता दायित्व पूरा नगरेको, शासन संरचना सुधार नगरेको र अमेरिकी क्रिकेटको प्रतिष्ठामा नकारात्मक प्रभाव पार्ने कार्य गरेको कारण यो कदम उठाइएको हो।
तर, अमेरिकाका राष्ट्रिय टोलीहरू आईसीसीका प्रतियोगितामा सहभागी हुन पाउनेछन् र २०२८ मा लस एन्जलस ओलम्पिकका तयारीहरू निरन्तर जारी रहने छन्। यसैबीच, अमेरिका क्रिकेटको प्रशासन र सञ्चालनको निगरानी आईसीसी वा यसको नियुक्त कमिटीले गर्नेछ। आईसीसीले अमेरिका क्रिकेटमा सुधारका लागि Normalization Committee नियुक्त गरेको छ, जसले शासन, सञ्चालन र संरचनामा आवश्यक सुधार पूरा नभएसम्म सदस्यता अधिकार फिर्ता नहुने जनाएको छ।
यस निर्णयले अमेरिका क्रिकेटलाई आफ्नो प्रशासनिक कमजोरी सुधार्न बाध्य बनाउने अपेक्षा गरिएको छ। आईसीसीले सुधार र पारदर्शी व्यवस्थापन कार्यान्वयन भए मात्र सदस्यता पुनः सक्रिय गर्ने जनाएको छ।
