असोज १७ गतेदेखि लगातार परेको अविरल वर्षाले देशभर ४३ जनाको ज्यान लिएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार सबैभन्दा धेरै इलाममा ३७ जनाको मृत्यु भएको छ।
रौतहटमा ३ जना, पाँचथर, खोटाङ र उदयपुरमा जनही १ जना गरी अन्य जिल्लामा पनि जनहानि भएको छ। पाँच जना बेपत्ता छन्, जसमा स्याङ्जाका ४ जना खोलाले बगाएका र इलाममा १ जना पहिरोमा पुरिएका छन्।
अहिलेसम्म १२ जना घाइते भएको विवरण प्राप्त भएको छ। घाइतेमध्ये इलामका ४ जना, भोजपुरका ३ जना, खोटाङका ३ जना, पाँचथर र मकवानपुरका जनही १ जना रहेका छन्।
वर्षाले सडक अवरुद्ध र बस्ती डुबानमा परेपछि इलामको माङसेबुङमा अलपत्र परेका २ जनालाई हेलिकप्टरमार्फत उद्धार गरिएको छ। सरकारले असोज १८ देखि २० गतेसम्म लामो दूरीका सवारी सञ्चालन रोक्दै उच्च सतर्कता अपनाउने निर्देशन दिएको छ।
