पूर्वप्रधानमन्त्री K. P. Sharma Oli लाई भिडियो कन्फ्रेन्समार्फत काठमाडौँ जिल्ला अदालतमा भर्चुअल रूपमा उपस्थित गराइएको छ। शनिबार बिहान भक्तपुरको गुन्डुस्थित निवासबाट पक्राउ परेका उनलाई म्याद थपका लागि अदालतमा प्रस्तुत गरिएको हो।
जिल्ला सरकारी वकिल कार्यालयका सह–न्यायाधिवक्ता रामहरी शर्मा काफ्लेका अनुसार पक्राउ पुर्जीको समर्थन र म्याद थपसम्बन्धी दुई विषयमा अदालतमा बहस भइरहेको छ। उनले ओली अदालतसँग लाइभ कनेक्टमा रहेको र आवश्यक परे थप बयान लिन सकिने अवस्थामा रहेको जानकारी दिए।
भदौ २३ गतेको जेनजी आन्दोलनबारे गठित जाँचबुझ आयोगको प्रतिवेदनले ओलीमाथि कारबाही सिफारिस गरेको थियो। सोही प्रतिवेदन कार्यान्वयन गर्ने मन्त्रिपरिषद्को निर्णयपछि उनलाई पक्राउ गरिएको हो।
हाल स्वास्थ्य समस्या देखिएपछि ओली त्रिभुवन शिक्षण अस्पतालमा भर्ना छन्। स्वास्थ्य अवस्थाकै कारण उनलाई भर्चुअल माध्यमबाट अदालतमा उपस्थित गराइएको बताइएको छ।
