इन्डियन प्रिमियर लिग (आईपीएल) क्रिकेटमा गुजरात टाइटन्सले दमदार प्रदर्शन गर्दै राजस्थान रोयल्सलाई ७७ रनले पराजित गरेको छ। गएराति सम्पन्न खेलमा गुजरातले पहिले ब्याटिङ गर्दै २० ओभरमा ४ विकेट गुमाएर २२९ रनको विशाल योगफल बनायो।
गुजरातका लागि शुभमन गिलले ८४ रन र साई सुदर्शनले ५५ रनको अर्धशतकीय पारी खेले। वासिङ्टन सुन्दरले ३७ रनको योगदान दिए। राजस्थानका तर्फबाट ब्रिजेश शर्मा, रविन्द्र जडेजा र यश पुञ्जाले समान १–१ विकेट लिए।
२३० रनको लक्ष्य पछ्याएको राजस्थान १६ ओभर ३ बलमा अलआउट हुँदै १५२ रनमै समेटियो। राजस्थानका रविन्द्र जडेजाले ३८ रन, वैभव सूर्यवंशीले ३६ र ध्रुव जुरेलले २४ रन जोडे पनि टोलीलाई जित दिलाउन सकेनन्।
गुजरातका राशिद खानले ४ विकेट, जेसन होल्डरले ३ र कागिसो रबाडाले २ विकेट लिए। यो जितसँगै गुजरात १४ अंकसहित दोस्रो स्थानमा पुगेको छ भने राजस्थान पाँचौँ स्थानमा छ।
