भारतका प्रधानमन्त्री Narendra Modi ले इन्धनको खपत घटाउन र आगामी एक वर्षसम्म सुन खरिद नगर्न नागरिकलाई आह्वान गरेका छन् ।
हैदराबादमा आइतबार आयोजित भारतीय जनता पार्टीको र्यालीलाई सम्बोधन गर्दै उनले विश्वव्यापी संकट र छिमेकी देशमा जारी युद्धका कारण पेट्रोल, डिजेल र ग्यासको मूल्य अत्यधिक बढेकाले सतर्कता अपनाउनुपर्ने बताएका हुन् । मोदीका अनुसार भारत जस्तो देश, जहाँ आफ्नै ठूलो तेल भण्डार छैन, त्यहाँ इन्धन बचत अनिवार्य आवश्यकता बनेको छ ।
उनले दैनिक जीवनमा इन्धन खपत घटाउने उपाय अपनाउन आग्रह गर्दै वर्क फ्रम होमको प्रयोग बढाउन, साथै सम्भव भएका स्थानमा सार्वजनिक यातायात, विशेषगरी मेट्रो रेलको उपयोग गर्न सुझाव दिएका छन् ।
साथै, उनले सुन खरिदसम्बन्धी विषयमा पनि नागरिकलाई विशेष आग्रह गर्दै आगामी एक वर्षसम्म कुनै पनि प्रकारका कार्यक्रम वा अवसरमा सुन नकिन्ने संकल्प गर्न आग्रह गरे । उनका अनुसार, विगतमा संकटका बेला दानको परम्परा रहे पनि अहिलेको अवस्थामा सुन खरिद घटाउँदा अर्थतन्त्रमा सकारात्मक प्रभाव पर्नेछ । मोदीले सुन आयात घटे विदेशी मुद्रा बचत हुने र देशको आर्थिक स्थायित्वमा सहयोग पुग्ने बताएका छन् ।
