एसीसी यू–१६ इस्ट जोन कप क्रिकेटअन्तर्गत आज नेपालले समूह चरणको तेस्रो खेलमा इन्डोनेसियासँग प्रतिस्पर्धा गर्दैछ। मलेसियाको सेलेङ्गोर टर्फ क्लबमा हुने खेल बिहान पौने ८ बजे सुरु हुनेछ।
नेपाल समूह ‘ए’ मा अपराजित रहँदै लगातार तेस्रो जित निकाल्ने लक्ष्यमा छ। हाल दुई खेलमा दुई जितसहित ४ अंक जोडेको नेपाल दोस्रो स्थानमा रहेको छ। इन्डोनेसियाले एक खेलमा जित र एकमा हार भोग्दै २ अंकसहित चौथो स्थानमा छ।
नेपालले पहिलो खेलमा सिंगापुरलाई ६ विकेटले र दोस्रो खेलमा जापानलाई ९ विकेटले हराएको थियो। इन्डोनेसियाले भुटानलाई ९ विकेटले हराए पनि सिंगापुरसँग ९ विकेटले पराजित भएको थियो।
समूह ‘ए’ मा सिंगापुर ६ अंकसहित शीर्ष स्थानमा छ भने जापान २ अंकसहित तेस्रो स्थानमा छ। भुटान अंकविहीन छ।
नेपालले अब समूह चरणको अन्तिम खेल १ जुलाईमा भुटानसँग खेल्नेछ। प्रतियोगितामा १० टोली सहभागी छन्। दुई समूहमा विभाजित टोलीमध्ये शीर्ष दुईले सेमिफाइनलमा स्थान बनाउनेछन्।
