साफ यु-२० महिला च्याम्पियनसिपको तेस्रो खेलमा नेपालले श्रीलङ्कामाथि ७-० को फराकिलो जित निकालेको छ। ढाकास्थित बसुन्धरा किङ्स एरेनामा ढिलो सुरु भएको खेलमा नेपालले पहिलो हाफमै पाँच तथा दोस्रो हाफमा दुई गोल गर्यो।
नेपालको जितमा मिना देउवाले ८औं, ४२औं र ७०औं मिनेटमा गोल गर्दै ह्याट्रिक पुरा गरिन्। पूर्णिमा राईले दुई गोल गर्दा समीक्षा मगर र सरिता नाथले एक–एक गोल गरे।
जितसँगै नेपालले तीन खेलबाट ६ अंक जोडेको छ। बङ्गलादेश ९ अंकसहित शीर्षस्थानमा छ। नेपालले पहिलो खेलमा भुटानलाई ६-१ ले हराएको थियो भने दोस्रो खेलमा बङ्गलादेशसँग पराजित भएको थियो। श्रीलङ्का भने प्रतियोगितामा अझै जितविहीन छ।
