दोस्रो संस्करणको नेपाल प्रिमियर लिग (एनपीएल) अन्तर्गत आज (बुधबार) काठमाण्डु गुर्खाज र सुदूरपश्चिम रोयल्स आमनेसामने हुँदैछन्। सोमबार उद्घाटन खेलमै साविक विजेता जनकपुरलाई पाँच विकेटले हराएर उच्च मनोबल बनाएको काठमाण्डु आज साविक उपविजेता सुदूरपश्चिमसँग अर्को चुनौतीपूर्ण खेलमा उत्रिँदैछ। दुवै टोली विजयी अभियानलाई निरन्तरता दिन चाहने भएकाले आजको खेल निकै निर्णायक मानिएको छ।
दिउँसो ४ बजे त्रिवि मैदानमा सुरु हुने खेलमा काठमाण्डुको नेतृत्व करण केसीले गर्नेछन् भने सुदूरपश्चिमलाई दीपेन्द्रसिंह ऐरीले कप्तानी गर्नेछन्। पहिलो सिजनका उपविजेता सुदूरपश्चिमले विदेशीसहित बलियो टोली उतारेको छ। न्यूजिल्याण्डका स्कट कुगेइलिन, अमेरिकाका हर्मित सिंह, अस्ट्रेलियाका जोश ब्राउन र क्रिस लिन टोलीमा शामिल छन्। साथै दीपेन्द्र ऐरीसँग विनोद भण्डारी, आरिफ शेख, अविनाश बोहरा, हेमन्त धामीलगायत खेलाडीले आजको खेलमा महत्वपूर्ण भूमिका खेल्नेछन्।
एनपीएल दोस्रो सिजन मङ्सिर १ देखि २७ सम्म कीर्तिपुरस्थित त्रिवि मैदानमै सञ्चालन भइरहेका छन्। कुल ३२ खेल रहेको यो सिजनमा लिग चरणदेखि तीन प्लेअफ र फाइनलसम्मको यात्रा रहनेछ। क्यानले प्रत्येक खेलका लागि सीमित टिकट बिक्री गरिरहेको छ। सामान्य टिकट पाँच सयदेखि १५ सयसम्म, जबकि प्रिमियर टिकट एक हजारदेखि दुई हजारसम्म निर्धारण गरिएको छ।
आठ फ्रेन्चाइज टोलीबीच चलिरहेको यो लिग आजको काठमाण्डु–सुदूरपश्चिम खेलसँगै झनै प्रतिस्पर्धात्मक बन्दै जाने निश्चित छ।
