धनगढी उपमहानगरपालिकाका मेयर गोपाल हमालले नयाँ बन्ने सरकारले सुदूरपश्चिम प्रदेशमा धार्मिक पर्यटनको विकासलाई प्राथमिकता दिनुपर्ने बताएका छन्। भारतको अयोध्या भ्रमणको अनुभव उद्धृत गर्दै उनले राम मन्दिर पुनर्निर्माणपछि देखिएको आर्थिक गतिविधि र विकास नेपालमा पनि लागू गर्न सकिने बताए।
मेयर हमालका अनुसार धार्मिक पर्यटनले गरिबी न्यूनीकरण, स्थानीय जनताको आय वृद्धि र रोजगारी सिर्जना गर्न महत्वपूर्ण भूमिका खेल्छ। धार्मिक तथा सांस्कृतिक सम्पदाको संरक्षण, व्यवस्थापन र प्रभावकारी प्रचार–प्रसारले आस्था र पर्यटन दुवै मजबुत बनाउँछ।
सुदूरपश्चिममा रहेका धार्मिक स्थलहरू व्यवस्थित विकास गर्न सके आन्तरिक र बाह्य पर्यटक आकर्षित गर्न सकिन्छ। यसले क्षेत्रीय आर्थिक समृद्धिमा योगदान पुर्याउने र स्थानीय व्यवसाय प्रवर्द्धन गर्ने भएकाले सरकारको विशेष ध्यान आवश्यक रहेको मेयर हमालले बताएका छन्।
