मौसम पूर्वानुमान महाशाखाका अनुसार पश्चिमी तथा स्थानीय वायुको प्रभावले देशभर मौसममा मिश्रित अवस्था देखिएको छ। हाल पहाडी र हिमाली क्षेत्रमा बादल लाग्ने क्रम जारी रहँदा केही स्थानमा मेघगर्जन र चट्याङसहित हल्का वर्षा भइरहेको छ। विशेषगरी कोशी, बागमती र गण्डकी प्रदेशका पहाडी भू–भागमा बदली बढी देखिएको छ भने गण्डकीका केही क्षेत्रमा वर्षा भइसकेको छ।
विभागका अनुसार शुक्रबार यी प्रदेशका उच्च भू–भागमा वर्षा र हिमपातको सम्भावना छ। कर्णाली र सुदूरपश्चिमका हिमाली क्षेत्रमा पनि आंशिक हिमपात हुनसक्ने अनुमान गरिएको छ।
यता तराई तथा भित्री मधेसमा भने मौसम सफा रहँदै तापक्रम क्रमशः बढ्दो छ। मधेस, लुम्बिनी र सुदूरपश्चिमका तराई क्षेत्रमा अत्यधिक गर्मी बढ्ने संकेत देखिएकाले जनजीवन प्रभावित हुनसक्ने चेतावनी दिइएको छ।
