जल तथा मौसम विज्ञान विभागअन्तर्गत मौसम पूर्वानुमान महाशाखाले हाल नेपालमा पश्चिमी तथा स्थानीय वायुको प्रभावसँगै पूर्वी भूभाग नजिक रहेको न्यून चापीय क्षेत्र सक्रिय रहेको जनाएको छ। यस प्रणालीका कारण देशका अधिकांश क्षेत्रमा मौसम बदली भएको छ भने केही स्थानमा वर्षा र हिमपातको सम्भावना देखिएको छ।
महाशाखाका अनुसार अहिले कोशी, मधेस, बागमती र गण्डकी प्रदेशका साथै देशका हिमाली र पहाडी भूभागमा सामान्यदेखि पूर्ण बदली रहेको छ। अन्य भूभागमा आंशिक बदली देखिएको छ।
आज दिउँसो कोशी, मधेस, बागमती, गण्डकी र लुम्बिनी प्रदेशसहित कर्णाली र सुदूरपश्चिमका पहाडी तथा हिमाली क्षेत्रमा बदली रहनेछ। यी प्रदेशका धेरै स्थानमा चट्याङ्गसहित मध्यम वर्षा हुने सम्भावना रहेको छ भने उच्च पहाडी तथा हिमाली क्षेत्रमा हिमपातको सम्भावना पनि छ।
विशेषगरी कोशी प्रदेशका पहाडी क्षेत्रमा एक–दुई स्थानमा भारी वर्षा हुन सक्ने जनाइएको छ। त्यस्तै तराईका केही क्षेत्रमा हावाहुरी चल्ने सम्भावना रहेकोले सतर्कता अपनाउन आग्रह गरिएको छ।
आज राति पनि देशका अधिकांश प्रदेशमा बदली कायम रहनेछ। कोशी, मधेस, बागमती र गण्डकीका धेरै स्थान तथा अन्य प्रदेशका केही स्थानमा चट्याङ्गसहित वर्षा र हिमपात हुने सम्भावना महाशाखाले जनाएको छ।
