अमेरिकाबाट डिपोर्ट भएका २ महिलासहित १९ जना नेपाली बुधबार त्रिभुवन अन्तर्राष्ट्रिय विमानस्थल आइपुगेका छन्। अमेरिकी सरकारले चार्टर विमानमार्फत् डिपोर्ट गर्ने क्रममा उनीहरूलाई विमानस्थल अध्यागमन कार्यालयको जिम्मा लगाएको हो।
चार्टर विमानबाट ३७ जनालाई ल्याउने भनिए पनि प्राविधिक कारणले बाँकी १८ जनालाई पछि पठाउने तयारी भइरहेको जनाइएको छ।
डिपोर्ट भएर आएका १९ जनालाई नेपाल प्रहरीको मानव बेचविखन अनुसन्धान ब्युरोले थप सोधपुछको लागि जिम्मा पाएको छ। ब्युरो प्रमुख एसएसपी कृष्ण पंगेनीका अनुसार सम्बन्धित व्यक्तिहरुसँग सोधपुछ जारी छ।
सन् २०२५ को जनवरी २२ पछि अमेरिकाले २ सय ३४ जना नेपालीलाई निस्कासन गरेको छ। डोनाल्ड ट्रम्पको दोस्रो कार्यकालका लागि जिम्मेवारीमा आएपछि वैध कागजातविहीन आप्रवासीहरूलाई नेपालसहित विभिन्न देशबाट धमाधम डिपोर्ट गरिएको हो।
