हाल मनसुनको न्यून चापीय रेखा सरदर स्थान आसपास रहेकाले देशभर साधारणतया बदली भएको मौसम पूर्वानुमान महाशाखाले जनाएको छ।
शनिबार बिहान कोशी र बागमती प्रदेशका पहाडी क्षेत्रका केही स्थानमा, गण्डकी र कर्णाली प्रदेशको एक–दुई स्थानमा हल्कादेखि मध्यम वर्षा भएको महाशाखाले जनाएको छ।
दिउँसो पनि देशभर सामान्य बदली रहने अनुमान छ। देशका पहाडी भूभागका केही र तराईका थोरै स्थानमा मध्यम वर्षा हुने सम्भावना छ। साथै, कोशी, गण्डकी, लुम्बिनी र कर्णाली प्रदेशका पहाडका एक–दुई स्थानमा भारी वर्षा हुने सम्भावना रहेको छ।
आज राति पनि देशभर सामान्य बदली रहनेछ। कोशी, मधेस, बागमती र गण्डकी प्रदेशका केही स्थानमा र बाँकी पहाडी तथा तराईका थोरै भूभागमा मध्यम वर्षा हुन सक्ने महाशाखाले जनाएको छ। यसैगरी, कोशी, मधेस, बागमती र गण्डकी प्रदेशका पहाडी क्षेत्रमा भारी वर्षा हुने सम्भावना रहेको उल्लेख गरिएको छ।
महाशाखाले कोशी, मधेस, बागमती, गण्डकी, लुम्बिनी र कर्णाली प्रदेशका एक–दुई स्थानमा भारी वर्षा हुने भएकाले आवश्यक सतर्कता अपनाउन आग्रह गरेको छ।
