🕉️ महाशिवरात्रि तयारी अन्तिम चरणमा: पशुपतिमा आठ लाख भक्त आगमनको अनुमान

सुदूरखबर संवाददाता २०८२ फाल्गुन २, शनिबार ०५:४७

मिनेट515जना

काठमाडौँस्थित पशुपतिनाथ मन्दिर क्षेत्रमा महाशिवरात्रि पर्वलाई लक्षित गर्दै तयारी अन्तिम चरणमा पुगेको छ। पशुपति क्षेत्र विकास कोष ले यस वर्ष पर्वलाई व्यवस्थित, सुरक्षित र श्रद्धालुमैत्री बनाउन बहुआयामिक योजना कार्यान्वयनमा ल्याएको जनाएको छ।

कोषका कार्यकारी निर्देशक सुभाष जोशीका अनुसार महाशिवरात्रिका दिन कम्तीमा आठ लाख दर्शनार्थीले पशुपतिनाथको दर्शन गर्ने अनुमान गरिएको छ भने करिब चार हजार साधुसन्त सहभागी हुने अपेक्षा छ। अत्यधिक भीड व्यवस्थापनका लागि चार छुट्टाछुट्टै लाइनमार्फत दर्शनको व्यवस्था गरिएको छ। ज्येष्ठ नागरिक, अपाङ्गता भएका व्यक्ति तथा विशिष्ट अतिथिका लागि छुट्टै लाइनको प्रबन्ध मिलाइएको छ।

सुरक्षा व्यवस्थापनका लागि नेपाल प्रहरी, सशस्त्र प्रहरी बल र ट्राफिक प्रहरीको संयुक्त टोली परिचालन गरिनेछ। सिसीटिभी निगरानी, मोबाइल गस्ती, हराएकाको खोजतलास तथा आपतकालीन उद्धार तयारी सुदृढ गरिएको छ। पशुपति क्षेत्र आसपास सवारी आवागमनमा विशेष व्यवस्था मिलाइनेछ भने पैदलमार्ग र आपतकालीन सवारीका लागि छुट्टै रुट निर्धारण गरिएको छ।

खानेपानी, शौचालय, विश्रामस्थल र प्राथमिक उपचार केन्द्र थप गरिएका छन्। बागमती किनार क्षेत्रमा विशेष सरसफाइ अभियान सञ्चालन गरी फोहर व्यवस्थापनका लागि अतिरिक्त डस्टबिन र टोली परिचालन गरिएको छ।

महाशिवरात्रिको राति विशेष पूजाआजा, आरती, भजन–कीर्तन तथा धार्मिक प्रवचन कार्यक्रम आयोजना गरिनेछ। कोषले श्रद्धालुलाई अनुशासन पालना गर्दै शान्त र सभ्य रूपमा पर्व मनाउन आग्रह गरेको छ।