अत्यधिक गर्मी बढ्दै गएपछि कैलालीको धनगढी उपमहानगरपालिकाले आफ्नो क्षेत्रभित्र सञ्चालित सबै सामुदायिक तथा संस्थागत विद्यालय चार दिनका लागि बन्द गर्ने निर्णय गरेको छ। उपमहानगरपालिकाको शिक्षा शाखाले जारी गरेको सूचनाअनुसार असार ९ गतेदेखि १२ गतेसम्म विद्यालयमा पठनपाठन स्थगित रहनेछ।
केही दिनयता बढेको तापक्रमका कारण विद्यार्थीको स्वास्थ्यमा प्रतिकूल असर पर्न सक्ने सम्भावनालाई ध्यानमा राख्दै यो निर्णय गरिएको शिक्षा शाखाले जनाएको छ। अत्यधिक गर्मीले विशेषगरी बालबालिकामा डिहाइड्रेसन, थकान, टाउको दुख्ने तथा अन्य स्वास्थ्य समस्या देखिन सक्ने भएकाले सावधानी अपनाइएको हो।
उपमहानगरपालिकाले बिदाको अवधिमा विद्यार्थीलाई घरमै सुरक्षित रहन, अनावश्यक रूपमा घाममा बाहिर ननिस्कन तथा प्रशस्त पानी पिउन आग्रह गरेको छ। साथै अभिभावकलाई पनि बालबालिकाको स्वास्थ्यप्रति विशेष ध्यान दिन र गर्मीबाट बच्ने उपाय अपनाउन अनुरोध गरिएको छ।
उपमहानगरपालिकाले मौसमको अवस्थालाई निरन्तर अनुगमन गर्दै आवश्यक परे थप निर्णय गरिने जनाएको छ। विद्यालय सञ्चालनबारे अर्को सूचना जारी भएपछि मात्रै नियमित पठनपाठन सुरु हुनेछ।
