राष्ट्रिय स्वतन्त्र पार्टी (रास्वपा)का सांसद कवीन्द्र बुर्लाकोटीले मतदान गर्ने न्यूनतम उमेर १८ वर्षबाट घटाएर १६ वर्ष कायम गर्न प्रस्ताव गरेका छन्। बुधबार प्रस्तावित प्रमुख निर्वाचन आयुक्त मानबहादुरको संसदीय सुनुवाइका क्रममा उनले युवाको राजनीतिक सहभागिता बढाउन यस्तो व्यवस्था आवश्यक रहेको धारणा राखे।
बुर्लाकोटीले १६ वर्ष उमेर समूहका युवालाई पनि लोकतान्त्रिक प्रक्रियामा सहभागी गराउने विषयमा राष्ट्रिय बहस हुनुपर्ने बताए। उनका अनुसार मतदानको उमेर घटाइएमा युवाको राजनीतिक चेतना, जिम्मेवारीबोध र निर्णय प्रक्रियामा सहभागिता अझ प्रभावकारी बन्न सक्छ।
उनको प्रस्तावमाथि संसदीय सुनुवाइ समितिमा सामान्य छलफल भए पनि हालसम्म कुनै औपचारिक निर्णय भएको छैन। मतदानको उमेर घटाउने विषय संवैधानिक र कानुनी संशोधनसँग जोडिएको भएकाले यसबारे थप राजनीतिक तथा कानुनी बहस आवश्यक पर्ने देखिएको छ।
