देशभर मनसुनी सक्रियता बढेसँगै मौसममा व्यापक परिवर्तन देखिएको छ। जल तथा मौसम विज्ञान विभाग, मौसम पूर्वानुमान महाशाखाका अनुसार हाल कोशी, मधेस, बागमती, गण्डकी र लुम्बिनी प्रदेशको पूर्वी भागमा मनसुनको प्रभाव छ भने पश्चिम क्षेत्रहरूमा पश्चिमी वायु र स्थानीय वायुले असर पारेको छ।
मंगलबार देशभर आंशिकदेखि सामान्य बदली रहने अनुमान गरिएको छ। कोशी, बागमती, गण्डकी र लुम्बिनी प्रदेशका केही स्थानहरू तथा अन्य प्रदेशका थोरै ठाउँहरूमा मेघगर्जन, चट्याङसहित हल्कादेखि मध्यम वर्षाको सम्भावना छ।
कोशी, बागमती र गण्डकी प्रदेशका एक–दुई स्थानमा भारीदेखि अति भारी वर्षा हुन सक्ने भएकाले बाढी, पहिरो तथा डुबानको जोखिमलाई लिएर सतर्कता अपनाउन विभागले सुझाव दिएको छ। विशेष गरी उच्च पहाडी र हिमाली भू–भागहरूमा पनि मौसम खराब रहने भएकाले यात्रा र जनजीवनमा प्रभाव पर्न सक्ने देखिन्छ।
त्यस्तै, कोशी, बागमती र गण्डकी प्रदेशका उच्च हिमाली भेगका केही स्थानहरूमा हिमपातको सम्भावना पनि रहेको छ। बाँकी पहाडी क्षेत्रमा पनि हल्का वर्षा र हिउँ पर्ने पूर्वानुमान गरिएको छ।
विभागले संभावित प्राकृतिक जोखिमका कारण सतर्कता अपनाउन सर्वसाधारण, स्थानीय प्रशासन र सम्बन्धित निकायलाई आग्रह गरेको छ। अत्यधिक वर्षा हुने सम्भावित क्षेत्रमा आवश्यक पूर्वतयारी गर्न र जोखिमयुक्त क्षेत्रमा नजान पनि अनुरोध गरिएको छ।
