देशका विभिन्न भागमा मौसमी प्रणालीको दोहोरो प्रभाव देखिन थालेको छ। मौसम पूर्वानुमान महाशाखाका अनुसार हाल कोशी, मधेस, बागमती, गण्डकी र लुम्बिनी प्रदेशका पूर्वी क्षेत्रमा मनसुन सक्रिय छ भने पश्चिम भूभागमा पश्चिमी वायु र स्थानीय प्रणालीको आंशिक प्रभाव परेको छ।
यसको कारण आज देशभर आंशिकदेखि पूर्ण बदलीको अवस्था रहेको छ। बागमतीका केही स्थान र कोशी, लुम्बिनी तथा कर्णाली प्रदेशका एक–दुई स्थानमा चट्याङसहित हल्कादेखि मध्यम वर्षा भइरहेको छ।
दिउँसो र राति कोशी, बागमती, गण्डकी र लुम्बिनी प्रदेशका धेरै स्थानहरूमा र अन्य प्रदेशका केही भूभागमा चट्याङसहित हल्कादेखि मध्यम वर्षा हुने सम्भावना रहेको छ। साथै, यीमध्ये केही स्थानमा भारीदेखि धेरै भारी वर्षाको सम्भावनासमेत देखिएको छ।
देशका उच्च पहाडी र हिमाली भूभागहरूमा हल्का वर्षासहित हिमपात हुने पूर्वानुमान गरिएको छ।
मौसममा तीव्र परिवर्तनका कारण जनजीवन, कृषि, स्वास्थ्य, यातायात र हवाई उडानमा असर पर्ने सम्भावना रहेकोले मौसम पूर्वानुमान महाशाखाले सर्तकता अपनाउन अपिल गरेको छ। विशेषगरी भारी वर्षा हुने क्षेत्रका बासिन्दालाई सचेत रहन र आवश्यक पूर्वतयारी गर्न आग्रह गरिएको छ।
