सर्लाहीमा एक जना शिक्षक रामपुकार यादव को गोली हानी हत्या भएको प्रहरीले जनाएको छ।
प्रहरीका अनुसार राति साढे ८ बजे घर अगाडि मोटरसाइकलमा आएका हतियारधारीले यादवमाथि गोली प्रहार गरेका थिए। टाउकोमा लागेको गोलीका कारण गम्भीर घाइते भएका यादवलाई उपचारका लागि महोत्तरीको रामगोपालपुरस्थित जानकी एकेडेमिक अस्पताल लैजाँदै गर्दा बाटोमै मृत्यु भएको छ।
गोली हानेर भाग्ने क्रममा मोटरसाइकल दुर्घटना हुँदा एक व्यक्ति पक्राउ परेको छ। पक्राउ परेका व्यक्तिको नाम प्रहरीले सार्वजनिक गरेको छैन। उनी पनि गम्भीर घाइते भएका कारण सर्लाहीको लालबन्दी मोडेल अस्पतालबाट प्रादेशिक अस्पताल जनकपुरमा थप उपचारको लागि पठाइएको छ।
प्रहरीले घटनामा संलग्न अन्य केही व्यक्तिहरू फरार रहेको र खोजी जारी रहेको जनाएको छ।
