मेडिकल व्यवसायी दुर्गा प्रसाईंविरुद्ध सार्वजनिक शान्तिविरुद्धको कसुरमा प्रहरीले थप ४ दिन म्याद थप गरेको छ। काठमाडौं जिल्ला प्रशासन कार्यालयले जिल्ला प्रहरी परिसर काठमाडौंको अनुरोधमा उनको हिरासत म्याद थप ४ दिनका लागि बढाउने निर्णय गरेको प्रहरी प्रवक्ता एसपी पवनकुमार भट्टराईले जानकारी दिए।
प्रसाईंले मंसिर ७ गते देशभर आन्दोलन गर्ने घोषणा गर्दै तयारी गरिरहेका बेला काठमाडौं उपत्यका अपराध अनुसन्धान कार्यालय टेकु र प्रहरी परिसर काठमाडौंको संयुक्त टोलीले उनलाई पक्राउ गरेको थियो।
प्रहरीका अनुसार प्रसाईंले सार्वजनिक शान्ति भंग हुनसक्ने अभिव्यक्ति तथा गतिविधि गरेको आशंकामा पक्राउ गरिएको हो। म्याद थपसँगै उनी कम्तिमा अर्को ४ दिनसम्म प्रहरी हिरासतमा रहनेछन्।
