नेपाली कांग्रेसले प्रतिनिधि सभा निर्वाचनका लागि उम्मेदवार चयन गर्न संसदीय बोर्ड गठन गरेको छ। पार्टी विधानअनुसार गठन गरिएको उक्त बोर्डले तल्ला निकायहरूबाट प्राप्त सिफारिसका आधारमा उम्मेदवार छनोट गर्ने कांग्रेसले जनाएको छ।
उपसभापति विश्वप्रकाश शर्माका अनुसार कांग्रेसले देशभरका १६५ निर्वाचन क्षेत्रमै उम्मेदवारी दर्ता गर्ने तयारी गरेको छ। उम्मेदवारी दर्ताको मिति माघ ६ गते तोकिएको छ।
गठन गरिएको संसदीय बोर्डमा पार्टी सभापति गगन थापा, उपसभापतिहरू, महामन्त्रीहरू तथा सहमहामन्त्रीहरू समावेश छन्। हाल बोर्डमा १३ सदस्य रहेका छन्। नेताहरूका अनुसार आवश्यकता अनुसार एक–दुई जना सदस्य थप गर्ने सम्भावना पनि खुला राखिएको छ।
संसदीय बोर्ड गठनसँगै कांग्रेसले निर्वाचन तयारीलाई तीव्रता दिएको संकेत देखिएको छ। पार्टीले योग्य, लोकप्रिय र जित्ने सम्भावना भएका उम्मेदवारलाई प्राथमिकतामा राखेर चयन प्रक्रिया अघि बढाउने जनाएको छ।
