आयरल्यान्डका अलराउन्डर कर्टिस क्याम्फर व्यावसायिक क्रिकेटमा लगातार पाँच बलमा पाँच विकेट लिने पहिलो पुरुष खेलाडी बनेका छन्। मन्स्टर रेड्सबाट खेलेका क्याम्फरले इन्टर-प्रोभिन्सियल टी–२० ट्रफीमा नर्थ–वेस्ट वारियर्सविरुद्ध यो कीर्तिमान बनाएका हुन्।
क्याम्फरले २.३ ओभरमा १६ रन खर्चेर ५ विकेट लिए। कप्तानसमेत रहेका उनले दोस्रो र तेस्रो ओभरमा पाँच विकेट लिएका थिए। वारियर्स ८७/५ को अवस्थामा ८८ रनमै अलआउट भयो।
१२औँ ओभरको पाँचौँ बलमा जारेड विल्सनको स्टम्प उडाउँदै उनले सुरुवात गरे। त्यसपछि ह्युमलाई एलबीडब्लु, म्याकब्राइनलाई क्याच आउट, मिलरलाई विकेटकिपरले समाते र अन्त्यमा जोस विल्सनको स्टम्प भत्काउँदै पाँच बलमा पाँच विकेट लिए।
यो कीर्तिमान महिलातर्फ २०२४ मा जिम्बाब्वेकी केलिस एनढ्लोभुले पनि बनाएकी थिइन्।
