रुकुम पश्चिमको आठबीसकोट–१४ पिपलचौरस्थित भेरी नदीमा गएराति टिपर खस्दा चालकसहित तीनजना बेपत्ता भएका छन्।
जाजरकोटको नलगाड नगरपालिका दल्लीबाट रिम्नातर्फ जाँदै गरेको यती बिल्डर्सको रा १ क १५०१ नम्बरको टिपर भेरी करिडोरको निर्माण कार्यमा प्रयोग भइरहेको थियो। टिपर भेरी नदीमा खसेको पुष्टि इलाका प्रहरी कार्यालय रिम्नाका प्रहरी नायब निरीक्षक शिबकुमार चौधरीले गरे।
बेपत्ताहरूको खोजीका लागि रुकुम पश्चिम र जाजरकोटबाट प्रहरी टोली परिचालित गरिएको छ। तर, भेरी नदीमा पानीको बहाव उच्च भएकाले खोजी कार्यमा कठिनाइ भएको प्रहरीले जनाएको छ। हालसम्म बेपत्ताहरूको नाम र ठेगाना खुल्न नसकेको जनाइएको छ।
